شبرا...وأفعل التفضيل

أكبر عدد من المواطنين ممكن يعدي الشارع من غير ما تسول له نفسه حتى انه يبص ناحية العربيات...أكبر عدد منهم ساكن في شبرا

أكتر مكان ما يتلفتش نظرك فيه لمنظر القس يسير بجوار امرأة مخمرة(لابسة خمار)وبيضحكوا ويتكلموا... هو برضو شبرا

أكبر عدد من الأتوبيسات والميكروباصات شفته متجمع في حياتي برة الموقف...شفته في شبرا

أكتر مكان رحته حسيت ان حسني فعلا خرب البلد تماما وقعد على تلها...كان شبرا

أكبر تجمع للصيدليات بينها وبين بعض كام متر...هتشوفه في شبرا

أكتر الناس اللي عرفتهم في حياتهم واقتربوا مني لفترة طويلة...كانوا ولا يزالون من سكان شبرا

انا انهردة رحت شبرا...مش أول مرة ولن تكون الأخيرة طبعا إن شاء الله

لكن أول مرة أركز أن شبرا مصر سموها شبرا مصر لأنها جمعت كل مصر فعلا

صحيح أن فكرة السكن هناك تأتي إلى ذهني مصاحبة بزمارة كلكس عالية جدا بتسور وداني..لكن كمان فكرة عدم وجودها على لائحة الأماكن السياحية للأجانب وزوار مصر...فكرة تحسسك أنك عاوز تقول لهم...فاتتكم مصر

يا كل سكان شبرا.....تحياتي!!!

كتابتي بالعامية لا تحتاج اعتذار طبعا....فحديث اليوم كان عن ...شبرا مصر