Sunday, June 17, 2007

يوميات علي وعلية

علي وعلية راجعين من شغلهم بعربيتهم الساعة 5 العصر وماشيين على الكوبري...وطبعا علي اللي سايق
علية:الله...بص ياعلي المركبة الشراعية اللي ماشية في النيل دي؟؟؟شبه بالضبط صورة كانت على تابلوه كان متعلق عندنا في السفرة أول ما اتجوزنا...فاكره طبعا!!!...ألا هو راح فين صحيح؟؟؟
صمت طويل...علي ما فكرش حتى يرف بعينه ناحية المركبة....يلا ما علينا
.....................................................................
ومرت ربع ساعة
علي:لا حول ولا قوة إلا بالله....الله يخرب بيتك يا حسني...بصي يا عليةالحقي ..دول قفلوا الفتحة اللي كنا بنخش منها على البيت..إلاهي يشحططهم زي ما هما مشحططنا...هيا ناقصة عطلة؟؟؟
علية(متأففة وتنظر إلى شاشة موبيلها): انت لازم تشوف لك حل في بنتك شاغلة التليفون على طول...والله لا أدفعها الفاتورة الشهر دة من مصروفها احنا هنلاحق على رغي الهانم كمان؟؟..عاوزاها تولع على مية تغلي عشان سليق المكرونة
.....................................................................
صمت طويل تقطعه رنة موبيل علي:تعاليلي يا بطة...وأنا مالي هه...وسيبلي الشنطة....إلخ إلخ
ايه دة يخس عليك إنت غيرت رنتك؟؟...مش تقول لي يا علي ؟؟؟.......علية معلقة باهتمام شديد تظهره ملامح وجهها الجادة تماما بخصوص موقفها الغاضب المندد من علي
علي (يرد مدافعا):والله دة لسة أيمن زميلي باعتهالي انهردة قلت أحطها بدل الكآبة اللي احنا عايشين فيها!!!... دة انا حتى عامل لك مفاجأة..
علية:خير...قول
علي:لقيت لك أخيرا (الراجل دة هيجنني) بتاعة شويكارالأصلية بقى معمولة ومتضبطة ورنة آخر تمام هبعتهالك أول ما نروح
علية:ربنا يخليك ليا ولا يحرمنيش منك أبدا يا علي
......................................................................
ويسدل الستار ويروحوا البيت متهنيين وكويسين
طبعا...بدون تعليق

8 comments:

Anonymous said...

طيب وانتي زعلانة ليه؟؟
المهم ان هم متهنيين على حد قولك

Anonymous said...

قشطة!!
المهم بس هين اللي هيعمل المكرونة عشان انا جعان...البت ولا أمها؟؟ ولا علي؟؟

أندلس said...

دينا ...تفتكري متهنيين فعلا؟؟
محمد...أنت غالبا اللي هتعملها

تــسنيـم said...

عارفة انا قريتها اول ما نزلتيها وفعلا ملقيتش تعليق أكتبه لأني قريت اللي بين السطور


محبتي

أندلس said...

لذلك كتبتها...لتقرأوا ما بين السطور

نورتيني

mo'men mohamed said...

بجد يوميات جميله جدا
بس انت عارفه ان كانت بدل على شىء فهى بتدل على ان الشعب المصرى الى حد ما شعب هايف وسطحى
يمكن تكون دى هى الحقيقه
لكن وظيفتنا احنا اننا نخليه اعمق وأكثر ايجابيه من كده

Anonymous said...

اروح واجي الاقيكي زي ما انتى؟؟

أندلس said...

اكتب ازاي وانت برة القاهرة يد دودة
نورت مصر