Thursday, June 14, 2007

كوكب اسمه citystars...


في مصريين ساكنين في بيوت عادية وبيلبسوا هدوم عادية وبيروحوا مدارس عادية...وكل حاجة عادي...بالليل نفس المصريين دول بشحمهم ولحمهم بيتحولوا إلى كائنات أخرى...كائنات عجيبة جدا من أول شكل وشهم ومرورا بلبسهم وانتهاء بأصوات ضحكاتهم وكلامهم ...دول زوار من الفضاء لكوكب سيتي ستارز العجيب...ناس مش بنشوف شبههم في الشارع معرفش ليه؟؟!!!....لما بتعدي على الباب وتمر بالأمن بص يمينك وشمالك...حمدا الله على السلامة...انت كدة سافرت برة الأرض من غير فلوس طيران وتعب خالص تقريبا..حاول كدة تعمل أي تصرف غريب...صرخ مثلا بصوت عالي...ولا حد هيعبرك!!!!...البس قميص مشجر وفوقه كرافتة...برضو مش هيحصل حاجة...البسي ترترأو فضي علبة المكياج على وشك...ولا الهوا!!!...مش عارفة ايه سر هناك فعلا بس دي صفة متفق عليها تقريبا عن سيتي ستارز...الفكرة في ايه؟؟!!البلد دي عجيبة جدا فيها كل حاجة وكل أنواع البشر...والناس أعجب من البلد...قدرتهم على محاولة التكيف مع المتغيرات اللي حواليهم تخليك تضرب لهم تعظيم سلام..ولسة عايشين...وليهم نفس ينزلوا يتمشوا في سيتي ستارز...ينفصلوا عن عالمهم أيا كان شكله بيسيبوه برة سيتي ستارز...وبيدخلوا من البوابة...مبتسمين من الودن للودن..ويبقوا هما ال(سيتي ستارز)-نجوم المدينة-وتحيا مصر بلد العجايب...


في سيتي ستارز افتكرت حاجتين:..

الأولى...شفت الواد أبو جيل في شعره اللي مبلط في الديسكو...مع الاعتذار لزكي شان

الثانية...What happens in Vegas stays in Vegas!!!

2 comments:

تــسنيـم said...

وما الدنيا إلا مسرح كبير


فطبيعي لما نروح سيتي ستارز نتقمص شخصية تانية نلعب دورها

محمد العدوي said...

ما يعني ان المكان الحيط هو ما يصوغ شخصية الناس بصورة ما ..

يعني ممكن تكون الحدوتة زي البيضة والفرخة . لكن لما تكون شخصية المكان طاغية بترغم الداخل على تقمصها . تمام زي ناس كتير من القرى يسكنون المدن . مبيربوش فراخ في البلكونة .. وزي ناس كتير مننا متنطورين في دول الدنيا كلها ..


جملة الفكرة .. وجميل سيتي ستارز .