Sunday, August 5, 2007

شخابيط على جدار الزمن


وحشاني جدا وقفة بلكونة جدتي والفرجة على الناس رايحة وجيا وشوية الهوا اللي معادش في منه ولا في الساحل

وحشاني شقتنا القديمة بحيطانها الخضرة اللي كرهتني في اللون الأخضر للأبد

وحشاني ريحة السردين والكشري في مدرجات كلية البنات واحنا قاعدين في الاخر على الأرض وفارشين كرتون

واحشني الخيار المخلل اللي مفيش زيه بتاع تيتا الله يرحمها

وواحشني الخناق مع أصحابي في ثانوي وكنت ساعتها فاكرها أكبر مشاكل الدنيا

وحشاني حلاوة مصر اللي بقت ماسخة من كتر الفقر والظلم والفساد

وحشاني أي أكلة بنفس لأن حتى الحمام معادلوش طعم

واحشني جدا صوت العصافير الصبح...العصافير خرست معرفش ليه

انا انهردة وحشاني حجات كتيييييييير....وحشاني نفسي...


5 comments:

تسـنيم said...

بصي يا يويا كل مظاهر الافتقاد ممكن نتحملها إلا إن الواحد تبقى نفسه وحشاااه.. دوري عليها كويس


محبتي

حازم شلبى said...

تدوينتك الجميلة بكل ما فيها من اشياء بسيطة وحشاكى ذكرتنى بمصر ففى الغربة تصبح كل الاشياء البسيطة التى مرت علينا فى الوطن دون ان نعيرها اهتماما تصبح مخزون من الذكريات ينتزع روح الانسان من جسده ليلقى بها فى احضان الوطن ويمرمغها فى ترابه اشكرك على الكلام و سامحك الله على تقليب المواجع

امرأة تقول الذي لا يقال said...

احنا العصافير لسه بتزقزق عندنا (;
شوفتيني وانا ظاهرة بشخصيتي الحقيقية؟؟ ((:

انتى عارفة
انا ساعات بحس باللي انتى حسة بيه ده
هو مش بيبأى افتقاد.. بيبأى حنين
وساعتها من كتر ما انا ماشية حسة اني بفتقد على نفسي كده ببأى حسة جدا بأغنية أنا عندي حنين ما بعرف لمين
بس هي فترة وبتعدي
بجد أجمل حاجة في حياتنا ان كل حاجة فيها.. بتعدي

أندلس said...

تسنيم..
معاك حق جدا

حازم...
شرفتني بزيارتك..كررها
عفوا على الكلام اللي عجبك
وعذرا على اللي وجعك
على فكرة أنا مقيمة في مصر من 4 سنين
حلاوة الحاجة راحت وانا فيها
دة الي صعب الموقف زيادة

دينا..
يا عم على حبوب الشجاعة اللي دخلتك ظاهرة
بجد عندكم عصافير؟؟
انا شايفة انها مش أجمل حاجة انها تعدي يا دينا
كلو بقى بيعدي لدرجة البرود
معادش حاجة بتفرق
فاكرة عادل إمام..
احنا في زمن المسخ
جملة في عمارة يعقوبيان فكرني بيها مقال لتامر حبيب في الدستور
كفاية عليك رغي

امرأة تقول الذي لا يقال said...

لا انا مش معاكي
لو الحاجات مابتعديش كانت الحياة هتبأى صعبة جدا
كانت كل حاجة احنا توقفنا عندها في يوم من الايام لسه مستمرة معانا لغاية دلوقتى
انا اللي قصدي عليه انه بيعدي احساسك اللى انتى عايشاه دلوقتى مش ان الحاجات اللي حواليكي هي اللي بتعدي وتخلص